Muqdisho,(WNT):-Madaafiic xoogan oo ay qeybo ka mid ah Magaalada Muqdisho isku dhaafsadeen ciidamada dowlada KMG ah,Kuwa AMISOM iyo xoogaga ka horjeeda ayaa sababay khasaarooyin isugu jiray dhimasho iyo dhaawac.

Madaafiicdaan ayaa intooda badan ku dhacayay xaafado ka mid ah degmooyinka yaaqshiid iyo wardhiigleey ee Gobolka banaadir.

Tiro Madaafiic ah oo ku dhacday suuqa suuqbacaad ayaa la xaqiijiyay in ay ku dhaawacmeen ku dhawaad 7-ruux oo rayid ah kuwaasi oo ka dukaamaysanayay gudaha suuqa.

Sidoo kale laba ruux ayaa ku geeriyootay 4-kalena dhaawac ayaa soo gaaray kadib madaafiic ku dhacday xaafada xararyaale oo ka mid ah xaafadaha hoos yimaada degmada Wardhiigleey.

Lama oga dhinacyada dagaalku u dhaxeeyay khasaaraha soo kala gaaray,iyada oo aanay jirin wax war ah oo ka soo kala baxay.

Madaafiicdaan ayaa wal wal xoogan ku sii beeray dadka Muqdisho oo maalmihii la soo dhaafay wadnaha farta ku hayay kadib markii ay ka bad badatay hanjabaada ka soo baxaysa saraakiisha dowlada KMG ah.

Xafiiska Wararka Waayaha.net,Muqdisho.