Siminaar  ay isugu yimaadeen wakiilada shirkada Xawaalladda IFTIN EXPRESS ee UK,oo lagu qabtay Bridge Park Complex halka lagu magacaabo Stonebridge magaalada London, ayaa  ujeedadiisu ahayd sidii ay u dhaqan geli lahaayeen sharci cusub oo dhowaan lagu soo rogay shirkadaha Xaawalaha ka diwaan garaysan dalka ingiriiska. 

Sharcigaan oo lagu magacaabo  (Third EU Anti –Money  laundering Directive) ayaa wakiiladii shirkaan ka soo qayb galay waxay aad ugu dheeraadeen sidii sharcigaan cusub loo hir hir gelin lahaa,iyadoo laga dhaadhinacanyo macaamiisha shirkadaha iyo weliba sida uu iyaga u saamaynayo.

Sharcigaan ayaa dhaqan gelaya 15/12/2007 waxase shirkaddu soo hormarisay muddo bil  ah sidii ay u sii ay bari lahayd macaamiisheeda sharcigaan cusub.

Sharcigaan cusub ayaa qofka lacagta dirsanaya laga rabaa inuu la yimaado  waxyaabo cadaymo ah sida magaciisa oo buuxa, halka uu degan yahay iyo weliba dhalashadiisa, taasi oo aan horay u jiri jirin,waxaana iyana intas dheer oo qofka laga rabaa haddii uu dirayo lacag gaaraysa $1300 iyo wixii ka badan inuu la yimadaado aqoonsi sida Baasaboor iyo laysanka gaariga.

Shirkaan ayaa waxaa furay Naciim Cali oo ah madaxa shirkadda ee London, wuxuuna hadalkii ku wareegiyey C/rashiid Farax  oo ah madaxa shirkadda  ee dalka Ingiriiska.  C/rashiid ayaa si qoto dheer uga hadlay sidii ay shirkaddu ku gaarsiin lahayd wakiilada sharciyada caalamiga ee markaas soo baxa iyo weliba hir gelintooda.

Mar uu la halayey wakiilada ayuu Cabdirashiid carabka ku adkeeyey waajibka saraaran wakiilada iyo sida ay muhiim u tahay hirgelinta sharciyada markaas loo gudbiyo.

Waxaa isna sidaas oo kale shirkaas ka hadlay C/salaam Shariif oo ka socday Somali Financial Services Association (SFSA), waxaana uu sheegay in sharcigaan cusub ee soo baxay aan cid gaar ah laga raadsanayn ee ujeedadu tahay in lacagaha la dirayaa ay si sharciya ku baxaan, sida bangiyada iyo meelaha kale caalamiga ah ee lacagaha lagu diro.

C/salaam ayaa ku dhiiri geliyey wakiilada Shirkada IFTIN EXPRESS inay hir geliyaan sharcigaan, waxaana ugu baaqay dhamaan macaamiisha shirkada in arikaani uusan ahayn mid iyaga wax u dhimaya ama si gaar ah loogu beegsanyo.

Dadka lacaga dirsada qaarkood ayaa walaac ka muujiyey sharcigaan cusub waxaase shirkadu soo jeedisay in muhiim tahay macaamiisu sharciga u hogaasanto “qofku lacagtiisa isagaa leh  xorna u ah ma jiro cadad lacag ah oo loo xadiday” ayey yirahdeen maamulka shiradu iyagoo intaas raaciyey inay muhiim tahay in wax walba sharciga la waafajiyo.

Ugu danbaytii ayaa shirkadda IFTIN EXPRESS waxay ka codsatay macaamiisheeda labadan qodob.

1)-Macaamiisu inay la shaqeeyaan oo laga helo  ama ay dhiibaan waxaa uu sharcigu uga baahan  marka ay lacag dirsanayaan iyo marka lacag loo soo dirayo.

2)-Wakiiladu waa inay si buuxda uga dhaadhiciyaan macaamiisha sida sharcigu ayahay fuliyaana dhaqan gelinta sharcigaan cusub.

Gabagabadii shirkaan ayaa waxaa soo xiray Miciin Cali oo isagu ah mas'uulkii shirka soo qabanqaabiyey, wuxuuna u mahadceliyey wakiiladii iyo madaxdii ka soo qaybgashay shirkaan.

Abdirazak Yassin Caanogeel
WYN, London