Magaalada Muqdisho ayaa waxay ku Caanbaxday 16kii sano ee lasoo dhaafay meel laga ugaarsado dadka bulshada qiimaha weyn ugu fadhiyey sida, Culumada,Aqoonyahanka,Waxgaradka,Siyaasiyiintii aan hubeysnayn iyo waliba Saraakiishii Ciidamadii Qaranka Soomaaliyeed.
Dhamaan dadkaas ayaa lagu toogan jirey si kadis ah, mana jirin cid loo qaban jirey dilka dadkaas qiimaha ugu fadhiya bulshada.
Waxaa hubaal ah inay ahayd siyaasad lagu doonayey in lagaga takhaluso dadka wax garan kara isla markaana wax ka badali kara fikirka Shacabka miskiinka ah ee dagaalada sokeeye ay naafeeyeen.
Qowlaysatadii waxay horey usii galaafteen Suxufigii reer Sweden ee lagu dilay barxadda Tarabuunka,waxaa la orankaraa waxay ku jireen gabagabadii qandaraaskii qowlaystanimada ee ay mudada dheer ka wadeen Magaalada Muqdisho.
Joornaal kasoo baxa Dalka Sweden oo uu la shaqeyn jirey Suxufiga lagu dilay Xamar ayaa ku tilmaantay Magaalada Muqdisho " Farligaste plats i världen" meesha aduunka ugu khatarta badan ama ugu amaanka daran.
Waxaa iyana xusid mudan in hadda lagu tilmaamo Magaalada Muqdisho inay ka amaan fiican tahay mid ka mid ah Caasimaddaha Maraykanka ee Newyork.
Waa wax lagu farxo laakiin waxaan marnaba ku farxeyn Cadowga shacabka soomaaliyeed oo ay ugu horeeyaan dadkii ka ganacsan jirey dhiiga shacabkooda.
Qowlaysiga Cusub ee ka bilowday Baydhabo.
Magaalada Baydhabo ayaa waxaa marti ku noqday Dowladda lagu naanayso Tabar Yar ee laba sano ka hor lagu soo dhisay Magaalada Nairobi ee Dalka Kenya, kadib ay heshiin waayeen ninkii horey u marti galiyey oo markaas haystay Magaalada Jowhar.
Inta badan Mas'uuliyiinta Dowladda Federaalka ayaa lagu tirayaa rag darajada ama kuraasta ay ku fadhiyaan ku gaaray Qowlaysiga ka socday 16ka sano Dalka Soomaaliya, iyada oo loo kala hormariyey sida ay ugu kala horeeyaan ka ganacsiga dhiiga shacabka Soomaaliyeed ama Qowlaysiga dhiiga.
Waxaan ognahay rag dhowr ah oo kuraas ka waayey Dowladdaas iyo kuwa kale oo aan ku qancin kuraastii la siiyey inay ganacsi hor leh oo waji cusub leh ka bilaabeen Magaalada Muqdisho,Waxaana la oran karaa wuxuu ahaa Mashruucii ugu danbeeyey oo ay ka qabtaan Magaalada Muqdisho.
Waxaa xusid mudan in dhamaan dadkii ka qowlaysan jirey Dhiigga Shacabka Soomaaliyeed ay maanta xarun u wada tahay Magaalada Baydhabo, iyaga oo halkaas ka bilaabay howlihii lagu yaqaanay,waxaana maalin kasta lagu dilaa oo si bareer ah loogu toogtaa bartamaha Magaalada Baydhabo dadka leh sifooyinkii kuwii horey loo laynaayey 16ka sano.
Tii ugu danbeysan waxay ahayd Dilkii shalay Salaaddii jimco kadib loo geystay Allaha naxariistee Marxuum Cabdalla Deeroow Isaaq ka mid ahaa dadka fara ku tiriska ah ee aqoonta ka lahaa xukuumada Cali max'ed Geedi, iyada oo aan weli la cadayn ciddii dishay.
Hadaba waxaa is waydiin leh Su'aalo dhowr ah jawaabtoodana waxaan u daynayaa akhristayaasha.
Muxuu yahay xiriirka ka dhexeeya dilalkii 16ka sano ka socday Magaalada Xamar iyo kan hadda ka bilow Baydhabo?.
Suura gal ma tahay dadkii lagu tuhunsanaa inay cadowga shacabka Soomaaliyeed mashaariic kasoo qaataan si ay uga takhalusaan inta wax kala garanaysa inay yihiin kuwa hadda howshooda ka bilaabay Magaalada Baydhabo oo ay ku sugan yihiin?.
Xiriir ma ka dhaxayn karaa Ciidamada Ethiopia ee la sheegay inay ku sugan yihiin Magaalada Baydhabo iyo dilalka khaarijiska ah ee ka bilowday markii ay meesha soo galeen?.
Shacabka birtu ku bilaabatay ee Baydhabood mala gudboontahay inay dhulkooda ka illaashadaan dadka ku bilaabay waxaysan horey u aqoon mise arintu waxay tahay " shalay tabar baan hayey oo talo mahayn, maantana talo ayaan hayaa laakiin tabar mahayo"?.
Dhamaan Su'aalahaan iyo kuwa kale oo badanba waxaan u daynayaa inay ka jawaabaan akhristayaasha sharafta leh.
Said Samatar
saidsurcad@hotmail.com
Wayahacom@hotmail.com
Waayaha,Enköping,Sweden
