Ka dib kelmad soo dhoweyn ah oo uu soo jeediyey Guddoomiyaha Gobolka Cali-Sabiix, Ibraahim Suubane Rayaale, dood-wadaaggaas waxa si rasmi ah u furay Wasiirka Guriyeynta, Magaaleynta iyo Deegaanka, Mudane Cilmi Obsiiye Wacays. Sidoo kale, Waxa isagu na hadal kooban, oo ku aaddan dood-wadaaggaas, soo jeediyey Xaashi Cabdillaahi Orrax oo ka mid ah odayyada Naadiga PEN.

Dood-wadaaggaas, oo ay hagayeen mas’uuliyiinta Naadiga PEN, waxa kale oo ka qaybgalay dad badan oo ka kala socda qaybaha bulshada Gobolka Cali-Sabiix, sida aqoonyahanno, suugaanyahanno, hal-abuurro, odayyo dhaqameedyo, macallimiin, haween, dhallinyaro iyo war-fidiyeenno. Waxa aad looga dooday dhibaatooyinka haysta afka hooyo iyo baahida loo qabo in la qaado tallaabooyin degdeg ah oo lagu badbaadinayo jiridtaanka afka hooyo, kaas oo looga cabsi qabo in uu ka mid noqdo afafka dabargo’aya mustaqbalka dhow.

Doodahaas, oo ku bilaamay war-bixin uu jeediyay Guddoomiyaha Naadiga PEN, Dr Maxamad Daahir Afrax, war-bixintaas oo ay diyaarisay hay’adda UNESCO ee Qarammada Midoobay. War-bixintaasi waxa ay ka hadlaysay sida afaf badan oo manta dunida ka jira, gaar ahaan qaaradda Afrika, ay si dhaqso ah ugu dabargo’ayaan, taas oo sheegtay in bil walba labo ka mid ah afafkaas ay dhintaan.

Qodobbada dood-wadaagga waxa saldhig u ahaa saddexda qodob ee kala ah :

I.Dhibaatooyinka khatarta ku haya afka hooyo

II.Qorista iyo akhriska afka hooyo

III.Dedaallada ama tallaabooyinka degdegga ah ee afka lagu badbaadinayo

Talooyinkii dood-wadaagga

Markii aad looga dooday qodobbadaas, waxa dood-wadaagga ka soo baxay talooyinka soo socda :

1.in la fuliyo la na dhammaystiro talooyinkii iyo go’aannadii ka soo baxay toddobaadkii afka hooyo ee sanadkii 2006da;

2.in la dedejiyo dedaalka loogu jiro in ay af Soomaaliga iyo af Cafarigu ka mid noqdaan maaddooyinka lagu dhigo dugsiyada iyo jaamacadaha dalka, la na hirgeliyo xaadhumo dadka waaweyn afka lagu baro;

3.in waalidiintu ubadkooda ku dhiirrigeliyaan barashada afkooda

4.in la sameeyo dedaal wadareed oo dawladda iyo shacabku ba ugu gurmanayaan afka hooyo;

5.in la dhiirrigeliyo gacan na la siiyo shaqsiyaadka iyo ururrada daneeya horumarka afka hooyo, sida dadka soo saara wargeysyada ku soo baxa afka hooyo;

6.in Raadyaha iyo Telefishanka Jabuuti (RTD) laga baahiyo barnaamijyo laga barto dhigaalka afka hooyo.

Soomaalipen