Natiijado hordhac  ahayd ee doorashada baarlamaaka dalka Jabuuti ayaa saakay subaxnimadii hore 5:00 aroornimo lagu dhawaaqay, iyadoo najiitada lagu sheegay inay wax sidaas ah is dheerayn xisbiga talada haya iyo kuwa mucaaradku.

Wasiirka arrimaha gudaha dalka Jabuut  Xasan Dharaar Hufane ayaa mar uu war baahinta la hadlayey u sheegay in xisbiga talada haya ee UMP uu helay 49%, halka xisbiga ugu weyn mucaaradka ee USN isna uu helay  47.54% iyadoo xisbiga CPU ee is ah mucaaradku uu helay helay saddexda soo hartay.

Dowlada Jabuuti ayaa shaacisay in doorashadu dhacday si xor ah oo xaq ah halka mas’uul u hadlay xisbiga ugu weyn mucaaradka uu isna sheegay  in doorashada la musuq maasuqay.

Afhayeen u hadlay  xisbiga USN, Daahir Axmed Faarax (Daaf) ayaakolkii  ay soo baxday natiijada hordhaca ah waxaa uu warbaahinta u sheegay halkii looga dhawaaqay doorashada inaysan ku qanacsanayn natiijadaas,waxana uu intaasi raaciyey inay u joogeen goobaha codadka laga dhiibanayay goobjoogayaal u tirinayay codadka ayna hayaan warqadihii rasmiga ahaa ee cod-bixinta.

Daaf  ayaan sheegin waxaa ay ku dhaqaaqi doonaa, iyadoo lagu wado in laba maalmood ka dib si rasmi ah ugu dhawaaqaan golaha dastuuriga ah ee dalka Jabuuti oo loo gudbinayo codadka la tiriyay.

Doorashadan ayaa waxay noqonaysaa markii ugu horreysay oo mucaaradka dalka Jabuuti ay kuraas ku yeeshaan baarlamaanka dalkaas, iyadoo la ogyahay in baarlamaanku uu soo doorto madaxweynaha dalka.

 Waxaa jirtay cabsi laga qabay in xisbiga talada haya uu doorashada ku shubto maadaama dalka Jabuuti uu ka talinayey  xilligii uu xornimada qaatay,waxaana wadnaha farta lagaga hayaa in Ismaaciil Cumar Geelle mar  kale uu dib u soo laabto.

Xafiiska wararka Waayaha.net