MInneapolis,Axaddii, (Feb.17,2013):- Xildhibaan Cabdi Barre Yuusuf Jibriil oo in dhoweydba ku sugnaa magaalada Minneapolis ayaa la hadlay jaaliyadda Soomaaliyeed ee ku dhaqan magaaladaas, xil-dhibaanka ayaa sheegay in loo baahanyahay in jaaliyadda ay ka qayb qaadato dhismaha iyo horumarinta dalka Soomaaliya, "haddii jaaliyadaha dibadaha ku nool ay maal gashadaan dalka ay taasi suuro gelin lahayd si fudud nabad-gelyo ka hana qaadda dalka, waayo shaqooyin baa abuurmi lahaa, dhallin yarada meelo ay ka xoogsadaan bay heli lahaayeen, wax badan baa is bedeli lahaa" ayuu yiri Cabd Baree.

Waxaa kaloo kulankaas ka hadlay Xil-dhibaan Cabdi-Caziiz Yuusuf oo isaga laf ahaantiisa in muddo ku sugnaa magaalada Mineapolis, labada xil-dhibaan ayaa si wada jir ah uga hadlay in dalku u baahanyahay aqoonta iyo maskaxaha dadka qurbo-joogta ah, sidaas daraadeedna loo baahanyahay in qurbo joogta inay ogaadaan inuu waajib ka saaranyahay dalkooda.

Kulankan oo ay ka soo qayb galeen dad badan oo ka tirsan jaaliyadda ku nool magaalada Minneapolis ayaa ahaa mid si aad ah loo soo agaasimay loogana soo shqeeyay, ayaa ku dhammaaday dardaaran ay xil-dhibaannada u jeediyeen jaaliyadda Soomaaliyeed ee ku nool Minneapolis, waxayna ugu baaqeen inay midoobaan kana shaqeeyaan horumarka mujtamaca iyo dalka ay ku noolyihiin.