Ardey Soomaali ah iyo arday Amerikan madow ah ayaa waxaa la sheegay inuu dagaal xoogan ku dhex maray dugsi sare oo ku yaala magaalada Minneapolis. Minnesota ee dalkaas Mareykanka iyadoona uu dagaalkaas keenay qasaare dhaawac iyo bur bur kale isugu jira.

Dagaalkaan u dhaxeeyey ardaydaas Soomaalida iyo Afrikan Amerikanka ay wada dhigtaan iskuulka lagu magacaabo Minneapolis South High School, Minnesota  ee dalkaas Mareykanka ayaa waxaa uu ka bilowday xilligii lagu gudo jirey bareega cuntada iyadoona ay halkaas isku gacan saareeen ardeydaas Soomaalida iyo madowgaas Mareykanka ah, dagaalkaan oo ay ka qeyb qaateen ardey lagu qiyaasay 200 ilaa 300 oo arday ayaa waxaa la isku adeegsaday in la isku garaaco alaabtii meesha taalay iyadoona la isku weereeyey saxuuntii iyo koobabkii wax lagu cunaayey, maamulka iskoolka oo isku dayey inay arinta kala dhexgalaan ayaan ku guuleysan taas oo keentay inay u yeertaan booliiska magaalada iyadoona uu sidoo kale booliiska oo soo gaarey goobta ay ku adkaatey inuu qaboojiya xaalada iyadoona booliiskii sidoo kale ay qaar ka mid ah ardaydaasi ay kala hortageen weerar taas oo keentay inay booliisku isticmaalaan sunta indhaha dadka kaga ilmeysiiso si ay u kala kaxeeyaan ardeydaas ku dagaalameysay goobtaas raashinka lagu cuno.

Ugu dambeyntiina iyadoo aan dhab ahaan loo ogeyn waxa iyo sababta uu ku imaaday dagaalkaa ayaa waxay wararku qaar sheegayaan in ilaa iyo mudaba ay taagneyd xiisad u dhaxeysay ardeydaas Soomaalida iyo madowgaas kale, iyadoona ay Soomaalida oo sheegtay in looga tiro badan yahay iskoolkaas ay halkaas kala kulmaan cunsuriyeen iyo in la midab sooco oo ay qaar ka mid ah ardayda iskoolkaas ku hayaan midabtakoor, Soomaalida iskoolkaas dhigata ayaa waxaa la sheegay inay tiro ahaan ka yihiin iskoolkaas 8%  taas oo muujineyso in si aad iyo aad ah looga tiro badan yahay marka loo fiiriyo ardeyda kale ee dhigato iskoolkaas.

Halkaan ka daawo: http://www.youtube.com/watch?v=79TxQVd9GKg

Abdirizak M. (Xiireey)

Holland

Abdirizakxiireey@hotmail.com