Garowe (WNT)- Magaalada Garowe ee Caasimada Puntland habeenimadii xalay ahayd ee 17-ka bishan Feb 2013 ku beegnayd waxaa lagu qabtay Nadwo cinwaankeedu uu ahaa “MAXAY U DILEEN ALLAHA DILEE”.

Nadwadan oo ay masaajidka HUDAA ee bartamaha magaalada Garowe ku qabteen Culima’udiinka Soomaaliyeed ayaa waxaa looga hadlay dilkii Sheikh C/qaadir Nuur Faarax eebe ha u raxmadee loogu gaystay magaaladan Garowe.

Nadwadan oo ay ka soo qaybgaleen dadweyne aad u farabadan ayaa waxaa khadubado ka jeediyay Culimo farabadan oo ka mid ah Culima’udiinka Soomaaliyeed ee ku kala nool qaar ka mid ah gobollada Soomaaliyeed, waxayna so qoto dheer uga hadleen dilka Sheikh C/qaadir Nuur faarax iyo cidii ka dambaysay.

Waxay kaloo culimadu aad uga hadleen mabda’a loo dilay sheekha allaha u naxariistee iyo dadaalkii dheeraa ee uu diinta iyo ka shaqaynteeda u galay mudadii uu noolaa.

Intii Nadwadani ay socotay waxaa aad looga sheekeeyay taariikh Nololeedkiisii laga soo bilaabo dhalashadiisii ilaa dhimashadiisii maalmo ka hor.

Culimada Nadwadan khadubadaha ka jeedisay waxaa ka mid ah:

1.Sheikh Maxamuud Xaaji Yuusuf

2.Sheikh yuusuf Aadan Maxamed

3.Sheikh Dr. Bashiir Axmed Saalax

4.Sheikh C/naasir Xaaji Axmed

5.Sheikh Daahir Aw-cabdi

6.Sheikh Yuusuf Aadan Maxamed iyo culimo kale.

Culimadan Soomaaliyeed Mawduucyada ay sida qotoda dheer uga hadleen waxaa ka mid ahaa:-

◾Taariikh Nololeedkii Sheikh C/qaadir Nuur faarax iyo booska uu kaga jiro taariikhda Umada muslimiinta ah ee Soomaaliyeed.

◾YAA DILA MAXAYSE U DILEEN?

◾Dardaaran guud oo umada loo jeedinayo iyo qodobo kale oo muhim ah.

Culumadan soomaaliyeed intii ay dadwadani socotay waxay umada u soo jeediyay dardaaran adag iyo waano guud oo la xiriirta in ay u istaagaan badbaadinta mustaqbalka umada ee baabi’intiisa loo soo tafaxaytay iyo ilaalinta iyo garab istaaga Culimada oo ah indhihii umada una diidaan in ay waxyeelo gaarsiiyaan kooxaha taariikhda umada iyo nindoorka baabi’inaya.

Hadii alle idmo waxaanu qaybaha dambe idinkugu soo gudbin doonaa Khadubadihii Nadwadan oo dhamaystiran.

Xafiiska wararka Waayaha.net