Hay’adda Somali Advice And Information Service (Sominfos) oo si kulul u canbaareysay falkii waxashnimada ahaa ee lagu dilay Sheekhii  Shiikh Cabdulqaadir Nuur Faarax

Dhammaan maamulka iyo shaqaalaha hay’adda Somali advice and information services waxa ay si kulul u canbaareynayaan dilkii waxashnimada ahaa ee loo geystay Calaama Shiikh Cabdulqaadir Nuur Faarax (Cabdulqaadir Gacmeey) oo lagu dilay magaalada Garoowe isagoo gudanaya salad faral ah oo ah tii casarka ah. Runtii geeridaas waxa ay aheyd mid Soomaali oo dhan qof walboo damiir leh taabatay kuna reebtay argagax iyo calool xumo, tiiyoo geeridu ay xaq tahay haddana waxaa aad looga xumaaday in maalin walbaa wiilal yar yar oo ay gacan kale ay ka danbeyso loo soo adeegsado culimadeenii cisiga iyo sharafta ku dhex lahaa bulshoweynta Soomaaliyeed.

Waxaan mar labaad iyo mar saddexaadba leenahay arintaasi ama falkaas waa wax aan loo dulqaadan karin loona baahan yahay in laga dhiidhiyo, waxna laga qabto arimaha noocaas ah. Waxaan ugu baaqaya maamulka Puntland in ay arintaas ka feejignaadaan oo ay culimada Soomaaliyeed si gaar ah loo ilaaliyo loona karaameeyo. Maxaa diiday in masaajid walbaa la siiyo tansiilaad ay isku ilaaliyaan ama dhaqaale ha noqotee.

Runtii waa ayaandaro middii ugu weyneyd in culumeadeenii ummadda indhaha u aheyd in la ugaarsado. Soomaaliyeey wax noo haray ma jirto ee aynu culumadeenii ilaashano taasaa danteena ku jirtaa Adduun iyo Aakhiraba.

Waxaan ugu danbeyntii fursadan uga faa’ideysanayaa in aan halkan uga tacsiyeeyno dhammaan ummadda Soomaaliyeed, gaar ahaan reerkii uu shiikh ka geeriyooday, isagana Allaha naxariistii janatul Ferdowsa ka waraabiyo.

Wabilaahi Towfiiq

Gudoomiyaha hay’adda SOMINFOS

Cabdixakiim Jaamac Jooje