Dilka Sh Cabdiqaadir Nuur Faraax waxay taabatay dhamaan shacab weynaha Soomaaliyeed mid yar iyo mid weyn iyadoo aan lahayn wax xaydaab ah taas oo marag madooonto waxayna taas ku ridi doontaa  quuluubta kuwii soo maleegay rucbi iyo wel wel saa'id ah. Shiikha ugu horayn waxaan  Ilahaay uga baryayaa inuu naxariistiisa ha u waasiciyo meel wanaagsana geeyo.

Murugada ay leedahay dilka Shiikha waxaa ugu weyn dhowr qodob oo muhiim ah oo uu ugu horeeyo

1-Cilmigii iyo dacawaddii uu shacabka u gudbin jiray, waxaa shiikha lagu xusuustaa kaalintii uu ka soo galay gudbinta iyo u howl galka hadh iyo habeen uu u taagnaa ilaalinta shacaa'irta Islaamka una nasteexayn jiray qof walboo uu u arko inay haboon tahay isagoo aan u aabe yeeli jirin kursiga uu ku fadhiyo iyo mansabkiisa.

2-Horumarinta jiilka soo koraya: Shiikha Ilaahay janadiisa ha geeyee wuxuu hadh iyo habeen u taagnaan jiray kor u qaadida cilmiga noocayadiisa kala duwan wuxuuna ka mid ahaa aasaasayaashii Jaamacada Bariga Afrika uuna ka ahaa rukun adag. Mar aan shiikha kula kulmay badhig aanu u wada samaynaynay hoolka shirarka ee loo dhisi doono Jaamacada laanta Garoowe 9kii Janaayo 2012 waxaan xusi karaa inkastoo uu ahaa nin da'a ah haddana shaqada uu qabanayay iyo ka qayb qaadashada horumarka ummada uu la noolaa waxaan ku sifayn karaa albaab  weyn oo furmay  cid awdi kartaana  uusan muuqan .

3-Goobta iyo wakhtiga la dilay: waxaa murgo sedexaad ah oo ugub ku ah ummada Soomaaliyeed in maalin jimce ah, Salaad Casr gudaheed loogu badheedho Shiikh caalim ah dil ula kas ah laguna khaarajiyo halkaas.

4-Cida loo adeegsaday falka wuxuushnimada ah: waxaa iyana wax alaga naxo ah in wiil yar oo caqli iyo cimi toona lahayn loo adeegsaday dilkii caalimka iyadoo raggii soo maleegay falkaas fulaynimada leh ay ku dhuumanayaan daafaha aduunka ilaa iyo hadeerna la waayay nin ku dhiirada inuu sheegto taasina waxay muujinaysaa daciifnimada iyo diin darada ku xalaalaystay dhiiga ummada Islaamka gaar ahaan labadii shiikh ee ka mid ahaa culimada ugu cilmiga badnaa qaarada Afrika gaar ahaan bariga afrika.

Gebo Gebo

Ilaahay qabrigiisa ha u waasiciyo Shiikha waxaana ku soo gebogabyanyaa, in lagu samro dhib walboo yimaada sida iLahaay quraankiisa inoogu sheegay lana xasuusnaado in Shiikhu uusan bixin reer gaar ah, gobol gaar ah, jifo gaar ah balse wuxuu ka baxay dhamaan ummada Islaamka gaarhaan shacab weynaha Soomaaliyeed waxaa mudan in loo istaago hadafkii  gundhiga u ahaa Shiikheenii Cabdiqaadir Nuur Faraax lana tusaa belo wadayaashii falkaas soo maleegay in Sh Cabdiqaadir hadafkiisii nool yahay, cilmigiisii faafayo marnaba aysan joojin doonin waajibaadka ka saaran u adeegida dadka iyo dalka.

Engr Mohamud Ali Jidaal

Jidal5@hotmail.com