Soomaalida qaadka cunta ee ku nool dalkaas Holland ayaa waxaa la sheegay inay soo wajahday qaad la'aan ba'an iyo qiimaha qaadka oo uu ku yimid sare kac ka dib markii uu dhawaantaan ka hirgalay dalkaas sharci lagaga mamnuucaayo gebi ahaanba qaadka dalka Holland.

Sharcigaan qaadka looga mamanuucaayo dalka Holland oo dhaqan galay laga soo bilaabo 5tii bishaan Janaayo ayaa waxaa uu ku noqday Soomaalidaas qaadka cunta mid lama filaan ah oo lagu kadiyey, iyadoona inkastoo horey loo ogaa in dalkaas laga yaabo in laga mamnuuco qaadka ay hadana Soomaalidu u qaadatey oo ay iska dhaadhiciyeen inay tahay arin mudo qaadan doonto taas oo markii dhawaantaan mar qura ay ka warheleen in la joojiyey ayaga oo aan u diyaar garoobin ay ku naxeen arintaas, Sidoo kale ayaa warbaahinta dalka Holland oo xilligii ay socotey dooda ku saabsan joojinta qaadka si weyn uga hadli jirey arintaas aysan hada gebi ahaanba soo hadal qaadin hirgalinta iyo dhaqan galida sharcigaas looga mamnuucaayo qaadka dalka Holland taas oo shaki iyo jaahwareer ku riday Soomaalida qaadka cunta ee ku nool dalka Holland.

Ugu dambeyntiina iyadoo qaadka ama jaadka laga mamnuucay dalka Holland ayaa waxay dowoladaas u cuskatey inuu waxyeelo qofka maskaxdiisa iyo jir ahaanba, Laakiin arintaas oo aan ahayn sababta dhabta ah ayaa waxay tahay anshax xumada is gacan ka hadalka Soomaalida qaadka isticmaasha iyadoona ay joogto ka noqotey goobaha lagu iibiyo qaadka gacan ka hadal iyo inay Soomaalidaas mindiyo isku qaataan taas oo keentay inay canasho ka muujiyaan dadka degaanka, Soomaalida Holland oo jaadka u wareejiyey inay ka soo qaataan dalka Ingiriiska ayaa waxaa dhawaantaan markii ugu horeysay lagu qabtey Jaad nin ay warbaahinta Holland ku sheegtay inuu yahay nin u dhashay dalka Jarmalka oo 54 sano jir ah oo watay jaad gaaraayo ilaa iyo 40 kilo oo uu ka keenay dalka Ingiriiska oo uu damacsanaa inuu soo galayo dalka Holland asagoona lagu qabtey halka loo yaqaan Hoek van Holland ee magaalada Rotterdam ee dalkaas Holland.

Halkaan ka daawo :  http://www.youtube.com/watch?v=6UkfXgurNYE  

Abdirizak M. (Xiireey)

Holland

Abdirizakxiireey@hotmail.com