Boosaaso (KHamiis, Jan.10, 2013):-Madax-weynaha Puntland Cabdi-Raxmaan Max'ed Faroole ayaa maanta ku qaabilay xarunta madaxtooyada Puntland ee magaalada Boosaaso wafdi balaaran oo uu hor kacayay u qaybsanaha ariimaha Soomaaliya ee dowladda Maraykanka James Swan, sida la sheegay labada dhinac ayaa ka wada hadlay arrimo muhiim ah oo la xiriira dhinaca ammaanka gobolka guud ahaan iyo Soomaaliya.

Wararka aan ka helayno kulankii labada dhinac ay yeesheen qaarkood ayaa shegaya in si aad ah labada dhinac ay isula qaadaa-dhigeen guud ahaan arrimaha siyaasadda Soomaaliya, waxayna wafdiga Maraykanka u sheegeen hoggaanka Puntland inay aad u soo dhoweynayaan horumarka xagga dimuquraadiyeeynta iyo axaabta faraha badan ee ay ku talaabsatay Puntland.

Waxaa kulanka dhinaca Puntland uga qayb galay mas'uuliyiin ay ka mid ahaayeen waziirka maaliyadda Puntland Faarax Cali Shir iyo waziirka dekdaha Saciid Max'ed Raage, iyadoo dhinaca kalana ay James Swan wehliyeen saraakiil kale oo ahaa xubnihii socdaalkiisa ku wehliyay.