Madaxweynaha  dowlada Puntland Dr C/raxmaan Sheekh Maxamed Faroole ayaa xalay mar uu ka hadlayey dabbaal-deg loo sameeyay afar sano guuuradii kasoo wareegtay markii loo doortay madaxweynenimada Puntland oo xalay ka dhacday Boosaaso ayaa ka digay in fara gelin lagu sameeyo dastuurka dowladda federaalka Soomaaliya.

Dr Faroole ayaa sheegay inay aad uga xun yihiin hadalkii madaxweynuhu uu ku yiri dastuurka hadda jira laguma shaqeyn karo,waxayna taasi keeni kartaa buu yiri isku dhacyo cusub iyo inuu horseedo kala go’.

“Maalintii la xirayay baarlamaanka waxaan maqlay madaxweynaha oo afkiisa ka oranaya dastuurkan lagu dhaqmi karo, waxaana isbedel ku sameynaya xukuumadda iyo baarlamaanka, hadalkaas waa mid aan aad uga xumahay in aan maqlo, waxaana leeyahay yaan dalka dib loo celin, yaan isku dhac dambe la sameyn, sida la idinku doortay loona ansixiyay dastuurka waa in lagu dhaqmo,” ayuu yiri Faroole.

Waxaa kale oo intaasi sii raaciyey  in dowladda Soomaaliya looga baahan yahay inay fududeyso sameynta maamullada goboleedyada dalka si loo helo maamullo la mid ah Puntland, loogana wada xaajoodo sidii loo wadaagi lahaa khayraadka dabiiciga ah iyo dakhliga gudaha dalka laga helo.

“Waxaan ka suganaa dowladda federaalka Soomaaliya inay sahasho sidii ay dalka uga dhalan lahaayeen maamul goboleedyo. Waxaan ku talinaynaa in canqadaha laga daayo maamullada la dhisayo sida maamulka Jubbaland,  ayna dowladdu gacan ka geysato dhismaha maamul goboleedyada dadkuna ay talada yeeshaan,” ayuu yiri Dr Faroole mar kale isagoo arrinta maamul oboleedyada carabka ku adkeeyey.

Madaxweynaha Puntland ayaa sheegay  sheegay in la qabto shirar lagaga arrinsanayo wax-qaybsiga awoodaha siyaasadeed, dakhliga dowaldda iyo khayraadka dabiiciga ah.

Dr Faroole oo maanta ay bilaabatya sanad cusub oo maamulka Puntland sii hogaamin doono ayaa waxaa horyaal howl aad u baaxad weyn oo la doonayo dalku ugu talaabsado dhinaca nidaamka  axsaabta iyo doorashooyinka dawladaha hoose.

Xafiiska wararka Waayaha.net