Dhibaatada qurbaha. Gabaygaan waxaa la yiraahdaa (Dhibaatad qurbaha) wuxuuna sawir kooban ka bixinayaa dhibaatda laga dhaxlay dhoofka iyo sidii ay u beenoowday riyadii iyo rajadii la qabay markii lasoo safrayay, waxaa kale ee uu farta ku fiiqayaa sida sharftii iyo karaamadii uu lahaa muwaadinka soomaaliyeed ay hoos ugu dhacday markii layimid dhul aan lagaa aqoon, Waxaa kale ee uu la hadlayaa dadka hadda soo xir xiran ee doonaya in ay soo dhoofaan.
Gabaygan waxaan ku halqabsaday abwaan Galayr.
( DHIBAATADA QURBAHA )
Galayroow dhibaatada qurbaha dhaqankan doorsoomay.
Dhaayaha nin saaraad tohoo waad ka dhiidhidaye.
Waadigii ka qoray dhowrmaqaal dhoofku suuyahaye.
Aniguna dhankaygaan rabaa inaan fakar ka dhiibtaaye.
Dhowrkaan oraahood bal hoo iga dhab weeyaane .
Ragga dhoofka soo raba u sheeg hana dhageysteene.
Ragga dhaayda iska daadiyee dhoqoski ciideeyay.
Dhereg baa leh kibirkee u sheeg dhoofku waa halise.
Haday iyaga dheeldheel latahay dhaayo baan jirine.
Qurbo laguma dheefsado'e waa dhuumo oo miriqe.
Dhibaatada bilowgeedi iyo waa dhabanahaystiiye.
Dhurwaaguna wuxuu taagan yahay hilinki dheeraaye.
Dhaylada yaxaaskii la baray dhiiri lagu sheegye .
Dhaxantiyo qabowgiina waa howlo kuu dhimane.
Sharaftuna waxay kaa dhuntaa dhoofka dabadiise.
Dhakhtarkeeni waa kaa xamaam reer u dhaqayaaye.
Dhaqaalaha ragii korin lahaa daalyay dhabarkiiye.
Waakaa hablihi dhalilahaa dhaafay waayuhuye.
Waa kaa dharkii dadi lahaa goono dhaafsadaye.
Waayeeelki dhaqankii ka tage dhowrsanaan jiraye.
Waakaa dhalaankeeni gaal diin u dhigayaaye.
Dhaqankoodi waakaa la yiri dhaafa oo naca'e.
Waakaa sidii lagula dhalay laysku dhagayaaye.
Waakaa afkii laga dhunshood moodid ruux dhimane.
Waakaa inatay soo dhamaan dhuuqa koolada'e.
Waakaa salaadihi dhibsaday ama ka dheeraaday.
Alahayoow maxaa reer dhaqnaa yurub ku dhaadhaamay.
Alahayoow dhulkii noo nabdee waygu dheeryahaye.
Alahayow khilaafkana dhamee dhowrka sano taagan .
Dhaayaheenu alow ay arkaan dhaymanka iyo luulka.
Aloow dhoofka laga soo noqdaa dhalanrog weeyaane.
WQ: Cabdicasiis A. Mohamed (xoogsade)
aziizxg@hotmail.com.
Faafinta Waayaha.net
