Gaalkacayo(WNT)-Cabdi Xasan Cawaale (Qaybdiid) ayaa shaaca ka qaaday  inuu billowday qorshe lagu mideynayo maamullada ka jira gobollada dhexe ee Soomaaliya, isagoo sheegay in kulan u socday Ahlusunna iyo Galmudug maanta oo Isniin ah lasoo gabagabeynayo.

Jen. Qaydiid ayaa sheegay in qorshahan uu yahay mid looga gudbayo colaadaha iyo kala qoqobnaanta ka jirta deegaannada ku yaalla gobollada dhexe  isagoon faah faahin dheeraad ah ka bixin qorshaha uu wado ururada la wadaaga.

Qaybdiid ayaa haldalkiisa ku daray in xarunta Galmudug ay ku sugan yihiin xubno ka socda Ahlusunna Waljamaaca, ayna wadahadallo u socday labadii casho ee lasoo dhaafay ay soo gabagabeynayaan maanta oo Isniin ah mar uu waraysi siinayey laanta Afka Soomaaliga ee BBC_da.

Dhanka kale, ururka Ahlusunna Waljamaaca ayaa iyaguna soo dhaweeyay qorshaha la doonayo in lagu mideeyo mamullada ka jira gobollada dhexe ee Soomaaliya, iyadoo Ahlusunna ay sheegtay in qorshahan uu yahay mid wanaagsan oo ay rajo ka qabaan inuu guuleysto.

Guddoomiyaha saddexaad ee Ahlusunna, Sheekh Ibraahim Sheekh Xasan (Guureeye) oo ka mid ah xubnaha Ahlusunna ee ku sugan Gaalkacyo ayaa sheegay in maamulka Galmudug ay is-fagarteen ayna sidoo kale ka rajeynayaan maamullada kale inay iyaguna qayb ka qaataan qorshahan.

 Waxaa weli wax hadal ah arrintan ka soo saarin ururka  Ehlu Sunna waljameeca ee gobolka Galgaduud oo ah halka ururkaasi ugu xoog weyn yahay iyo weliba maamulka Ximan iyo xeeb oo xurguf siyaasadeed ka dhexayso maamulka Gal-mudug.

Xafiiska wararka Waayaha.net