Shir deg deg ah oo ay dhowaan magaalada London ku yeesheen qaar ka mid ah haweenka jaaliyada Putland ee UK ayaa ka dib dood iyo falanqayn dheer ka dib waxay soo saareen baaqa hoos ku qoran:-

Anagoo ku hadlayna magaca Haweenka jaaliyada Putland ee UK waxaan halkaan baaq ugu diraynaa dhammaan dadka reer Puntland meel kastoo ay joogaan inay si wadajir ah u ilaaliyaan midnimada, xasiloonida, nabadgelyada iyo adkaynta jiritaanka Puntland. Waxaan codsanaynaa in dhammaan siyaasiinta, isimida, waxgaradka, ganacsatada, aqoonyahanada, haweenka, dhalinyarada, iyo xukumada Puntland inay wax kasta ka horumariyaan jiritaanka iyo midnimada Puntland isla markaasna in wixii khilaaf siyaasadeed ah in lagu dhameeyo wada hadal, isu tunaasulid, iyo iyadoo loo noqdo sida uu qabo dastuurka u degsan Puntland.

Dhammaan jaaliyadaha reer Puntland waxaan si gaar ah uga codsanaynaa inay dhexdhaxaad ka noqdaan arimaha ka taagan Puntland isla markaasna aan si wadajir ah uga wada shaqayno ilaalinta midnimada iyo jiritaanka geyiga Puntland. Waxaan idin xusuusinaynaa in cadowga Puntland uu badan yahay isla markaasna ay jiraan dad wax kasta ku bixinaaya sidii meesha looga saari lahaa jiritaanka dhulkeena hooyo ee dal-udug (Puntland)!  

Ugu danbayntii waxaan ummadda reer Puntland ku dhiirigelaynaa inay isha ku hayaan dhibaatooyinka laga soo abaabulaayo qaybo ka mid ah Soomaaliya taasoo ujeedadu tahay in la khalkhaliyo nabadgelyada iyo jiritaan geyiga Puntland.  

Walaaleyaal meel kasta oo aad joogtaa xusuusta:

Nabad ayaa naas la nuugo leh

Dagaal wiil ayaa ku dhinta ee wiil kuma dhasho

Tiisa daryeele ayaa tu kale ku dara

Tanaasul iyo talo wadaag ayaa lagu tanaadaa

Wa bilaahi towfiiq

Baaqan waxaa magaalada London kasoo saaray qaar ka mid ah Haweenka jaaliyada Putland ee UK

Wixii faahfaahin dheeraad ah kala soo xiriira gudoomiyaha Jaaliyada haweenka Putland ee UK

email: faiza_boos@live.co.uk