War shalay ay faafiyeen war baahinta qaarkeen lagu sheegay in guddoomiyaha gobolka Bari C/samad Max’ed Gallan uu wax is daba marin iyo musuq maasu ku talaabsaday ayuu maanta gaashaanka u daruuray waxaanu tilmaamay kuwo aan sal iyo raad toonna lahayn lagu been abuurtay hadalkiisana la jar jaray wax aan jirina laga soo saaray.

Guddoomiyaha ayaa war saxaafadeed soo saaray waxaana war saxaafadeedku u qorraa sidan:

Waxaa jirtey in Ururada CASO NGO oo Hay’ada WFP kala shaqayn jirtey qaybinta raashinka Degmooyinka Qandala iyo Caluula ay isqabteen Dad u shaqayn jirey ka dib markii ay CASO bixin waayeen lacagtii shaqaalahaas iyo kuwo leh Baabuurta kireysnaa, ka dibna ay dadkaas soo gudbiyeen 25/12/2012 codsi ay wada saxiixeen, in mar hadii aysoo kala dhex gashay aamin daro iyaga iyo CASO, sidaas awgeed lacagtooda aan loo gacan galin CASO ee cid dhexdhexaad ah loogu dhiibo.

. Markaan qoraalkaas cabashada iyo codsiga ah helney 31/12/2012 waxaan Maxkamada ka codsaney iney hakiso dhaqdhaqaaqa xisaabta CASO NGO ee Dahabshiil, si aan lacagta Dadka Masaakiinta ah ee shaqeeyey loola bixin, waxaan kaloo WFP u qorey iyadoo la raacayo go’aanka Maxkamada in aan lacagtaas loo dhiibi karin CASO NGO ilaa ay ka heshiiyaan iyaga(CASO) iyo Dadka lacagta ku leh.

.Shabakadaha faafiyey Dacaayadaan been abuurka ah waa kuwo horey loogu yaqiiney iney lid ku yihiin horumarinta, Midnimada iyo amaanka Puntland, iyagoo sidaasoo kale horey uga been abuurtey Waxgaradka, Isimada, Nabadoonada iyo qaar ka mid ah Masuuliyiinta sarsare ee Dowlada.

.Sida uu fahmi karo Qof walba oo Wax ka yaqaan sida la isugu xirxiro silsilada hadalada(Codoka la isugu kabo) la duubay waa kuwo la isu geeyey oo soo noqnoqonaya oo ay isu geeyeen, waana kuwo munaasabado kala duwan la jeediyey, dabadeedna ay isu geeyeen cododka iney rabeen si ay uga sameeyaan macnaha Xun ee ay iyagu doonayeen.

Sidaas Darteen Waxaan ku wargalinayaa dhamaan Saxaafada horusocodka ah ee u heelan danta iyo maslaxada caamka ah isla markaasna leh akhlaaqaadka saxaafada in aysan waxba ka jirin Dacaayadaas balse ay tahay been abuur lagu sharaf dilayo guud ahaan Maamulka Dowlada Puntland iyo Masuuliyiinta.

Mahadsanid

Cabdisamad Maxamed Galan

Gudoomiyaha Gobolka Bari