Jowhar(WNT)-Wararka naga soo gaaraya magaalada Jowhar ee xarunta gobolka Shabeellada Dhexe ayaa sheegaya in ururkii Al-shabaab ay intooda badan isaga baxeen degmadaas iyadoo sii daayay maxaabiistii ay gacanta ku hayeen.

Dadka degaanka ayaa sheegay in ururka Al-shabaab ay isaga baxeen saakay goobihii ay ku sugnaayeen sida saldhigga booliiska iyo xarunta maamulka gobolka, waxayna sii daayeen maxaabiistii ay hayeen,waxaana sidoo kale albaabada la isugu dhuftay goobaha ganacsiga ee magaalada.

Xarunta Jowhar  ayaa ah degmada ugu weyn ku hartay gacanta ururka Al-shabaab, iyadoo ciidamada dowladda iyo kuwa AMISOM  la sheegay inay ku wajahan yihiin degmadaas iyagoo isu qaybiyey laba jiho.

Ciidamada dowladda iyo kuwa AMISOM ee ku wajahan magaalada Jowhar ayaa wararku sheegayaan inay xalay ku baryeen meel aan sidaasi magaalada uga fogayn,waxana la sheegay in kolkii ururka Al-shabaab ogaaday inay ciidamadani soo dhowaadeen ay isaga baxaan magaalada.  

 Ciidamada dowlada iyo kuwa AMISOM ayaa muddo dheer qorshaynayey in sidii ay gacanta ugu dhigi lahaayeen magaalada Jowhar oo leh muhiimad ciidan,sahlina karta isu furanka gobollada.

Xafiiska wararka Waayaha.net