Saaka subaxnimadii  ayaa waxaa madaafiic aan loo meel deyin ,waxay ku soo dhacay guryo ku yaalla xaafada Israac  ee waqooyiga magaalada Gaalkacayo,madaafiicdaasi oo sida la sheegay dumisay qeybo ka mid ah guryihii ay ku habsadeen.

Lama soo sheegin wax khasaare dhimasho iyo dhaawac ah oo ay gaysteen madaafiicdaasi,waxaase bur bur xooggan soo gaaray guryo ku yaalla xaafada Israac, waxaana la xaqiijiyay in hubkaasi ay soo tuureen maleeshiyaad  reer Gal-mudug ah oo kolkaasi ku sugnaa xaafadda Baraxlay.

Ma jirto illaa hadda cid ka hadashay weerarkaasi, waxaana jira dadweyne farabadan oo xaafada deggan kuwaasi oo ku soo xoomay halka madaafiicdu ay ku dhacday oo ah xaafado dad shacab ah deggan yihiin.

Waxaa si weyn looga dareemay magaalada Gaalkacayo hugunka iyo hanqarka madaafiicdaasi,waxana la dareemayaa ammaan darri soo food saartay magaalada Gaalkacayo.

 Ammaan darida ka jirta magaalada Gaalkacayo ayaa inta badan loo tiiriyaa inay ka timaado dhinaca xaafada Baraxlay ee maamulka Galmudug oo uusan ka jirin maamul awood leh iyo kale kala danbayn.

Maamulka Galmudug ayaa iminka waxaa isku haysta ilaa 3 madaxweyne oo ku wada sugan magaalada Gaalkacayo,waxana inta badan laga cabsi qabaa inuu yimaado isku dhac dhexdooda ah,waxaana dad badani qabaa arintaan weerarka waqooyiga magaalada Gaalkacayo inuu yahay mid dadka lagu marin habaabinayo laguna yaraynayo khilaafka halkaasi ka jira.

Xafiiska wararka Waayaha.net