Madaxweynaha dalka Turkiga  Cabdalla Guul ayaa shaaca ka qaaday arabadii shalay in shacabka iyo xukuumadda dalka Turkiga ay siin doonaan Soomaaliya taageero weyn oo dib loogu dhisayo, si ay beesha caalamka ugu noqdaan tusaale la raaci karo.

Madaxweynaha ayaa  hadalkaan ka sheegay shir jaraa'id oo ay wadajir u qabteen isaga iyo madaxweynaha Soomaaliya, Xasan Sheekh Maxamuud oo safar shaqo ku jooga isla dalka Turkiga.  

Dowladda Turkiga ayaa sannadkii hore olole lagu caawinayo dadka Soomaaliyeed ka sameysay Muqdisho, ka dib markii uu booqasho ku yimid ra'iisul wsasaaraha dalkaas, Recep Tayyip Erdogan xilli ay beesha caalamku aad uga baqayeen inay booqdaan Soomaaliya oo ay colaado ka jireen,iyadoo imaatinta albaaba u furay madax fara badan oo awal cabsi ka qabay imaatinka dalka Soomaaliya.

Turkiga waxay safaarad ka furteen Muqdisho iyagoo sidoo kalena billaabay inay diyaaradahooda duullimaadyo caalami ah ku tagaan Muqdisho markii ugu horreysay muddo ka badan labaatan sano.

"Arday Soomaaliyeed oo gaaraya 1,600 ayay dowladda Turkigu siisay waxbarasho heerar jaamacadeed ah, kuwaasoo wax ka barta dalkan," ayuu yiri Guul oo intaas raaciyay: "Turkiga waxay sidoo kale ka caawinayaan Soomaaliya dhismaha qaybaha kala duwan ee ciidamada sida milateriga iyo booliiska."

Madaxweynaha Soomaaliya, ayaa isaguna sheegay in booqashada uu ku tagay dalka Turkiga ay tahay mid uu ku adkaynayo xiriirka labada dal oo dib u billowday, wuxuuna xusay inuu la kulmi doono inta uu ku sugan dalkaas ganacsatada Turkiga si ay maalgashi ugu sameystaan dalka Soomaaliya.

Xafiiska wararka Waayaha.net