Ururka Sahal ka dib markii uu falanqeyn, iyo baaris dheer ku sameeyey xaalada safaaradii Soomaaliya ee Rooma waxaa usoo baxday in safiirka Soomaaliya u fadhiya Talyaaniga Nuur Xasan Xuseen (Nuur Cade), iyo xulufadiisa ay dhismahii safaarada u kireysteen si ka baxsan qaanuunka dalka u degsan isla markaasna qaabka heshiiska kireynta ay ka muuqato mid iib ah ka dib 10ka sano ee lagu sheegay in saafarada la kireystay (lease hold). Arintan fool xumada iyo fadeexada ah waxay muujinaysaa heerka ay maanta Soomaaliya taagan tahay iyo waxa laga filan karo ninka isku magacaabaaya inuu yahay danjire Soomaliyeed taasoo la is waydiin karo sidee danjire ku noqon karaa haddii uu ku kacay falka noocaan oo kale?  

Sidaasi darteed, madaxwaynaha Soomaaliya, Ras'iisal wasaaraha iyo wasiirada Arimaha dibada iyo guud ahaan ummadda Soomaaliyeed waxaan ka dalbanaynaa in arintan laga qaado tilaabo deg deg ah isla markaasna laga shaqeeyo sidii loo soo celin lahaa dhismaha safaaradii Soomaaliyeed. Waxaan madaxwayne Xasan Shiikh si gaar ah uga dalbanaynaa inuu kala cadeeyo inuu asagu si shakhsi ah ula og yahay kireynta dhismaha safaarada Soomaaliyeed ee Talyaaniga iyo inay tahay wax u khaas ah safiirka Soomaaliya ee Itaaliya iyo Midowga Yurub ee la dhaho Nuur Xasan Xuseen (Nuur Cade).

Hadaan nahay ururka Sahal waxaan mar kasta kasoo horjeednaa in la dhaco hantida iyo dhaxalka ummadda Soomaaliyeed iyo wax kasta oo dulmi iyo xaq darro u keeni kara guud ahaan ummadda Soomaaliyeed.

Ugu danbayntii waxaan ummadda Soomaaliyeed ugu baaqaynaa inaan la ogolaan in la dhaco ama qof si gaar ah u qaato hanti qaran oo ka dhaxaysa dhammaan ummadda Soomaaliyeed.

Warsaxaafadeed kasoo baxay Ururka Sahal Organisation,

Taariikh 29th November 2012Email: sahalorginternational@gmail.com

Daabacaadda Waayaha.net